Чебоксар гыч - сай результат дене

Теле каникул жапыште, 8 январьыште, Чебоксар олаште В.Н.Кочаков лӱмеш 5-ше номеран олимпийский резерван спорт школышто лӱмлö спортсмен, тренер-преподавтель, спорт пашаеҥ, Европын чемпионатшын ший призержо Иван Григорьевын призше верч эрыкан кучедалмаш дене турнир эртен.

Тушто 100 утла самырык спортсмен вийжым терген. Нуно 8 категорийыште таҥасеныт. Кучедалмаш 2003-2004 ийлаште шочшо рвезе-шамыч коклаште лийын. Турнирыште Шернур район гычат спортсмен-шамыч участвоватленыт да сай результатым ончыктеныт: 46 кг нелытан-влак коклаште 2-шо верым Дмитрий Тимин налын, 35 кг нелытан-влак радамыште 3-шо верыш Антон Яшкин лектын. Сеҥыше ден призер-влак грамот да шарнымашан медаль дене палемдалтыныт.

Людмила БЕРДИНСКАЯ.

Сергей Тиминын фотожо.