Школ мыйын илышыштем

Тыгай лўм дене шукерте огыл Памашсола илемлан, тудын лўмлӧ еҥже-влаклан, пашаче калыкшылан пєлеклалтше книга савыкталт лектын. Тушто тыгак Памашсола школын историйже, туныктышыжо, выпускникше-шамыч нерген оҥай материалым муаш лиеш. Книган составительже-влак - Памашсола илемысе ветеран-влак ушемын председательже Н.В.Тымбаева, туныктышо-влак Г.Н.Бирюкова, Н.П.Перминова, С.С.Игнатьева, Р.П.Попова, районысо ветеран-влак ушемын председательже З.Р.Зорина – кугу пашам шуктен, кундемнан историйжым шымлымашке аклаш лийдыме надырым пыштеныт.

- Книгам шукертак савыкташ шоненна. Мемнан тукымлан нунын ача-аваштын, кова-кочаштын кузе илымышт нерген каласкалыме шуын. Тек тиде книга шочшына, уныкана-шамычлан пӧлек лиеш, - палемден книган презентацийыштыже Памашсола школын ончычсо туныктышыжо Н.П.Перминова.

Людмила Бердинская.